Á aðalfundinum 20. apríl fekk Diabetesfelagið ein nýggjan nevndarlim, ein fokusbólk við fólki við typu2-diabetes og eina so deiliga vitjan av einum 7-ára gomlum drongi, sum er vorðin óførur ambassadørur fyri felagið

Karmarnir voru óførir, tá Diabetesfelagið setti aðalfundin á Parnassinum á Hotel Hafnia mikukvøldið 20. apríl klokkan 18:00.

Heilt fitt av limum vóru komnir, eini 45 tilsamans, og tveir nevndarlimir stóðu fyri vali. Allan Skaalum og Mórits Joensen vórðu báðir afturvaldir í nevndina, og fyri Marnu Ingeborg Hentze, sum av persónligum ávum vildi hava ein steðg, varð Terji á Lakjuni valdur. Kristiana Rein og Ørvur Joensen vórðu bæði afturvald sum tiltakslimir.

Í ársfrágreiðing sínari legði May-Britt Skoradal, forkvinna, dent á 40-ára føðingardagin hjá Megd, sum varð hildin í Noråurlandahúsinum 22. oktober.

Øll limafeløgini vóru boðin at hava ein bás, har høvi var at hava kunnandi tiltøk, og frammanundan hevði Diabetesfelagið gjørt avtalu við Videncenter for Diabetes um at fáa loyvi at brúka tveir diabetesfilmar, sum tey hava framleitt við danskari talu og teksti. Annar eru um typu 1- og hin um typu 2-diabetes. Vit fingu sett føroyska talu og tekst til filmarnar, sum vórðu klárir til Megd-føðingardagin, og teir blivu vístir á stórum sjónvarpsskíggja í forhøllini í Norðurlandahúsinum hendan dagin.

Aftrat hesum bjóðaðu vit fólki at fáa mált blóðsukur og annars at screena seg fyri typu 2-diabetes eftir tí finska screening-amboðnum, FINDrisk. Fleiri nýttu høvi til tað.

Eitt hæddarpunkt á degnum var ein snøgg bók, sum varð løgd fram, og sum Megd hevur latið skrivað um, hvussu tað er at liva við teimum ymsu sjúkunum, sum eru umboðaðar av limafeløgunum í Megd.

– Ambassadørurin fyri Diabetesfelagið var ein skilagóður og fittur ungur maður, sum eitur Hans Otto Holm, greiddi May-Britt Skoradal frá.

– Hann og foreldur hansara greiða í bókini frá, hvussu tað er hjá einum barni at liva við typu 1-diabetes, og hvussu tað ávirkar familjuna og gerandisdagin.

Hans Otto var á Parnassinum til aðalfundin saman við foreldrunum, Kára og Rannvá, og forkvinnan nýtti høvi at takka honum og geva honum eitt gávukort fyri ómakin.

– Túsund takk fyri, at tú ert eitt so gott og virkið umboð!, segði May-Britt Skoradal við Hans Otto, og so klappaði allur salurin fyri honum.

Tá forkvinnan hevði greitt aðalfundinum frá gongdini farna árið, og formligu viðurskiftini við aðalfundinum vóru avgreidd, var nátturðasteðgur.

Síðani var limatiltak á skránni, har Jens Andreasen, yvirlækni í diabetes, og Herborg Johannesen, yvirlækni í endokrinologi, greiddu frá søguni, nú insulin sum heilivágur hevur 100 ár á baki. Eisini greiddu tey frá, hvussu umstøðurnar hjá fólki við diabetes hava verið í Føroyum seinastu øldina, og hvat kann væntast av góðum framstigum í komandi tíðum.

At enda hevði Kristiana Rein at framløgu um tað stóra arbeiðið, sum gjørt verður í altjóða átakinum, Life for a Child, ið hevur sum aðalmál, at einki barn skal doyggja av insulintroti.

May-Britt Skoradal, forkvinna, greiddi eisini frá um arbeiðið at fáa Steno-sentur í Føroyum, har Diabetesfelagið hevur góða umboðan. Hon nýtti høvi á aðalfundinum at fáa fimm fólk við typu2-diabetes at koma í fokubólk at greiða frá, hvørjar royndir tey hava av diabetesviðgerðini í kommunulæknageiranum. Teirra íkast skal síðani brúkast til at bøta um tvørsektorella samstarvið, sum er neyðugt fyri at fáa bestu diabetesviðgerð.

Lesið alla ársfrágreiðingina fyri 2021 her.