Nýggj gransking er eitt týðandi fet fram móti meira vitan um, hvussu forðast kann fyri menningini av typu1-diabetes

Nýggj granskingarúrslit vísa, at virusheilivágur kann steðga menningini av typu1-diabetes hjá børnum, sum júst hava fingið staðfest sjúkuni.

Vísindaliga greinin, sum lýsir kanningina, stendur í Nature Medicine, og hon kann lesast her.

Kanningin er gjørd av 96 børnum millum 6 og 16 ár, og sum øll júst hava fingið staðfest typu1-diabetes, og tað eru danskir og norskir granskarar, sum hava arbeitt við málinum. Børnini vórðu býtt í tveir bólkar, har annar fekk viðgerð við virusmedisini í seks mánaðir. Eitt ár seinni staðfestu granskararnir, at tann bólkurin framleiddi “munandi meira” insulin.

Ein av granskarunum er Jesper Johannesen, professari og yvirlækni, sum arbeiðir á Steno Diabetes Center Copenhagen og á barna- og ungdómsdeildini á Herlev Hospital.

– Tað nýggja og spennandi er, at vit hava staðfest, at vit kunnu bremsa menningini av typu1-diabetes. Hetta er fyrstu ferð, at hesin heilivágurin er brúktur, og at vit síggja, at hann virkar, sigur hann við danska TV2.

Leingi hevur verið umrøtt, at virus kann spæla ein leiklut, tá typu1-diabetes mennist, og “vit hava nú staðfest, at virusinfektión kann spæla ein leiklut”, sigur Jesper Johannesen.

Áðrenn viðgerð fyri virus verður partur av viðgerðini á sjúkrahúsum, skal tó meira gransking til.

– Hetta er eitt fet á vegnum, sigur granskarin við TV2.