May-Britt Skoradal, forkvinna í Diabetesfelagnum, heldur, at útlitini fyri betri diabetesviðgerð eru góð, nú løgtingið viðger ætlanina um at stovnseta eina diabetesmiðstøð í Føroyum í samstarvi við NOVO Nordisk Grunnin

– Sum heild eru umstøðurnar hjá fólki við diabetes í Føroyum góðar, men rúm er altíð fyri ábót. Diabetesfelagið fegnast tí um ætlanirnar um at fremja átøk á diabetesøkinum. Vit gleðast um tey høvuðspunktini, sum tey koma inn á í virkisætlanini um fyribyrging og viðgerð. , sigur May-Britt Skoradal, forkvinna í Diabetesfelagnum.

– Vit gerast nú partur av samstarvinum millum Steno-miðstøðirnar í Danmark og Grønlandi, og hetta fer at geva okkum enn størri gagn av nýggjastu granskingini og vitanini á økinum. Hetta er sera spennandi, sigur forkvinnan við útvarpið hjá Kringvarpinum, nú løgtingið viðger uppskotið um samstarv við NOVO Nordisk Grunnin og stovnsetan av diabetesmiðstøð í Føroyum, sum hevur fingið heitið Steno Miðstøðin.

Fylg við viðgerðini av málinum á løgtingi her.

Málið fekk fyrstu viðgerð í tinginum 4. august 2022 og er í løtuni til viðgerðar í Fíggjarnevndini, sum eftir ætlan leggur álit fram 3. september.