Í virkisætlanini fyri nýggju Steno-miðstøðina í Føroyum standa mangar verkætlanir á diabetesøkinum fyri framman. Ein teirra snýr seg um at útbúgva fólk við diabetes, so tey megna góða eginumsorgan

Fólk við diabetes kenna tað so væl: Týdningarmestu viðgerðina fært tú frá tær sjálvum. Læknar og onnur fakfólk hava stóran týdning, men uttan góðar førleikar at handfara og viðgera tína egnu varandi sjúku, so fært tú mangan trupulleikar.

Í nýggju virkisætlanini fyri Stenomiðstøðina, sum á nýggjárinum skal stovnast í Føroyum, er ein spennandi verkætlan, sum snýr seg um at geva fólki við diabetes og teirra avvarðandi betri førleikar til at skilja og hava tamarhald á sjúkuni. Tey kalla hetta fyri “sjúklingaútbúgving”.

Stenomiðstøðin í Føroyum verður kallað SDCF (Steno Diabetes Center Føroyar), og tað verða fólk á SDCF, sum skulu menna og reka sjúklingaútbúgvingina, sum eisini skal fevna um netverksbólkar og evniskvøld fyri at stimbra vitanina um diabetes og harvið styrkja um eginumsorganina.

Í virkisætlanini stendur, at sjúklingaútbúgvingin til fólk við diabetes skal skiljast sum partur av viðgerðini annars, og umframt at hetta eisini skal vera eitt tilboð til avvarðandi, so skulu fremstu umsorganarpersónarnir hjá fólki við diabetes eisini fáa tilboðið.

Serligt fokus skal setast á fólk, sum í ávísan mun eru í viðkvæmari støðu, so sum eldri menn, børn og vaksin við ósunnari vekt, persónar við psykiatriskum sjúkum og etniskar minnilutar.

Fyri at røkka flest møguligum og fyri ikki at gera uppgávuna ov fløkta verður tilboðið í fyrsta umfari eitt og sama tilboð til øll. Síðani kann tað tillagast og mennast, so tað hóskar betur til einstakar málbólkar. Í longdini verður neyðugt at hava serstøk útbúgvingartilboð til fólk, sum bæði hava diabetes og aðra sjúku, so sum diabetes og sálarsjúku, diabates og rørslubrek og eisini diabetes og fylgisjúkur.

Í virkisætlanini stendur eisini, at talan í ávísum førum kann vera um talgilda upplæring, sum síðani verður styrkt við undirvísing í bólkum og netverkum, og hetta kann gerast sum temakvøld ella diabetescafé. Evnini kunnu vera angist, lágt blóðsukur og seksualitetur.

Undirvísingin skal vera tvørfaklig við til dømis lækna, sjúkrarøktarfrøðingi, føðslufrøðingi, fysioterapeuti og sálarfrøðingi.

Hendan sjúklingaútbúgvingin skal vera granskingargrundað, og sjúklingafeløg skulu eisini vera partur av fyrireikingini og undirvísingini. So boð verða ivaleyst eftir Diabetesfelagnum í hesum sambandi.