Í síðstu viku skipaði Ergo og fysioterapideildin á Landssjúkrahúsinum fyri skeiði í venjing til fólk við typu2-diabetes

Mong granskingarúrslit staðfesta, at vegleidd venjing hevur gagnliga ávirkan á blóðsukrið hjá fólki við typu2-diabetes, og greitt er eisini, at tað hevur týdning stuðla fólki, so tey eru kropsliga virkin í longdini eisini.

Í síðstu viku vóru fysioterapeutar á skeiði um júst venjing til fólk við typu2-diabetes, og tað vóru Ergo og fysioterapideildin á Landssjúkrahúsinum, sum skipaðu fyri.

Skeiðshaldarar vóru Stig Mølsted, granskari, fysioterapeutur og ph.d. frá granskingardeildini á Norðsjællands Hospital, og Susanne Grøn, fysioterapeutur, cand.scient.san. frá Træningssektionen Hillerød Kommune og Steno Diabetes Center Copenhagen.

Endamálið við skeiðnum var at veita luttakarunum feskastu vitanina, umframt at geva teimum neyv amboð, sum eru hent at brúka í dagliga arbeiðinum við fólki við typu2.

Kropslig venjing hevur, sum navnt, stóran týðning, tá tað snýr seg um at fáa tey høgu blóðsukrini at lækka, tí annars kunnu álvarsligar heilsuavleiðingar standast av støðuni. Vegleidd vengjing er eitt gott amboð til tað, umframt at kostur og medisin eisini er partur av viðgerðini.

Í Føroyum hava vit ikki skipaða venjing við fysioterapeuti til fólk við typu2-diabetes. Tey luttakandi á skeiðnum fingu góðan íblástur til, hvussu tað ber til, saman við øðrum fakbólkum, at samskipa dygdargóða viðgerð til fólk við typu2-diabetes, so hesi kunnu varðveita sítt virkni og sína góða heilsu.

14 luttakarar vóru á skeiðnum. Hesi vóru frá Landssjúkrahúsinum, Suðuroyar Sjúkrahúsi, eldraøkinum í Tórshavnar Kommunu, Norðoyar Bú- og Heimatænastu, Økistænastuni á Sandoy, Vesturvón og Roðanum.