Diabetesfelagið lýsir eftir tveimum fólkum, sum hava typu2-diabetes, og sum hava hug og hegni til at hjálpa IDF Europe við at fremja uppmerksemið heima og uttanlands um typu2

IDF Europe, sum er europeiski parturin av Altjóða Diabetesfelagsskapinum, hevur síðani 2022 arbeitt við einum talgildum palli um typu2-diabetes, sum hevur til endamáls at fremja vitan um typu2 og bøta um umstøðurnar hjá fólki við typu2.

Við í arbeiðinum eru í løtuni 15 vanlig fólk, sum hava typu2. Og nú farast skal undir annað stig í verkætlanini, sóknast IDF eftir tveimum føroyingum við typu2-diabetes, sum hava hug til at geva sítt íkast til hetta góða átak. Málið hjá IDF er, at bólkurin skal telja 50 typu-2-arar við ársenda.

Tað næsta, sum hendir, er ein innleiðandi kunningarfundur í Brússel 16. og 17. mars um átakið, og síðani verður farið undir fjarupplæring av nýggju fólkunum í bólkinum. Tá tey sjálv kenna seg tilreiðar, fáa tey møguleika til at taka lut á fundum við fólk, sum hava politiska ávirkan á økinum, at greiða frá egnari støðu við sjúkuni og annars geva íkast í verkætlanum í Føroyum og í ES.

Ongar ávísar royndir eru kravdar, men fólk, sum søkja, skulu helst:

• Vera sinnað at stuðla diabetessakini í Føroyum og í Europa og – tá tey eru til reiðar – at luttaka í panelum í vísindaligum verkætlanum, á fundum við politikarar, greiða frá persónligum royndum við typu2-diabetes osv.
• Duga enskt mál
• Verða sinnað at møta á einum ella tveimum fundum í Brússel, tveimum ella trimum talgildum fundum og luttaka í í minsta lagi einum av tiltøkunum, ið nevnd eru omanfyri

IDF fíggjar ferðir og uppihald í sambandi við arbeiðið.

Tú bjóðar teg fram við at fylla hetta oyðublaðið út og senda tað til forkvinnuna í felagnum maybrittskoradal@gmail.com.

Evstamark at søkja er 22. Februar 2024.

Allir umsøkjarar fáa svar, og møguligar samrøður verða áðrenn 25. februar 2024.

Tú ert vælkomin at kunna teg nærri við at ringja til okkum í Diabetesfelagnum á telefon 274020.