Góð almenn undirtøka var fyri fundinum, sum Diabetesfelagið skipaði fyri á altjóða diabetesdegnum um Steno-miðstøðina

Eyka stólar máttu finnast fram, og meira kaffi mátti bryggjast, tá Diabetesfelagið helt almennan fund á altjóða diabetesdegnum um nýggju Steno-miðstøðina, sum skal fáast á føtur 1. januar 2023.

Onkur helt, at eini 90 fólk mundu vera møtt fyri at hoyra, hvat Gunnvá Guttesen, leiðari á Medisinska deplinum á Landssjúkrahúsinum, har Steno skal staðsetast, hevði at siga um arbeiðið higartil, og hvat eru í væntu komandi árini.

Gunnvá Guttesen kundi ikki enn siga so nógv um, hvat ítøkiligt kemur at henda, tí arbeiðið skal fyrst leggjast væl tilrættis

Men málini eru stór og skulu geva okkum betri viðgerð, longri livitíð og betri lívsgóðsku, og til tað krevst betri hagtøl, samstarv, gransking og fyribyrging

Aftrat fíggjarkørmunum, sum verða býttir helvt um helvt millum fysiskar karmar og mennandi tiltøk, so verða eisini verkætlanir settar í verk, sum síðani verða eftirmettar. Og vísir eftirmetingin, at ávísa verkætlanin hevur riggað væl og eigur at halda fram, so verður tilmæli latið Heilsumálaráðnum um at útvega føroyska játtan til endamálið

Diabetesfelagið gleðir seg til at bjóða til nýggjan kunningarfund um Steno-miðstøðina, tá arbeiðið er komið longur á leið, tí hetta er sjálvandi eitt mál, sum okkara limir og felagið hava størsta áhuga í.

Gleðiligt var eisini, at fleiri nýggir limir teknaðu seg eftir fundin í gjárskvøldið. Og hevur tú eisini hug at gerast limur og stuðla felagnum í at arbeiða til frama fyri fólki við diabetes í Føroyum, so er ómakaleyst at tekna seg her.