Forkvinnan leggur frá sær
May-Britt Skoradal, sum seinastu næstan 10 árini hevur verið forkvinna í Diabetesfelagnum, takkar nú fyri seg
Á aðalfundinum hjá Diabetesfelagnum týskvøldið 11. mars skulu tveir nevndarsessir mannast av nýggjum. Annar sessurin er tann hjá forkvinnuni seinastu næstan 10 árini, May-Britt Skoradal.
May-Britt hevur við kønari hond staðið á odda fyri felagnum og verið ein dyggur og trúgvur forsprákari fyri bøttum umstøðum fyri fólk í Føroyum við diabetes.
Á sínum vanga á facebook mælir May-Britt øðrum til at bjóða seg fram.
– Kom og verð partur av nevndini í Diabetesfelagnum. Støðugt eru týdningarmiklar uppgávur at arbeiða fyri, so korini hjá fólki við diabetes í Føroyum eru tey bestu, skrivar hon.
– Eg leggi frá mær eftir skjótt 10 ár sum forkvinna. Hendan tíðin hevur verið góð, gevandi og spennandi – og Diabetesfelagið fer altíð at hava eitt serligt pláss í mínum hjarta.
– Nú skulu aðrar avbjóðingar hava sítt pláss, so kanska tú vilt taka eitt tørn? Kom á aðalfundin týskvøldið 11. mars klokkan 18:00 í Megdhúsinum, har m.a. nevndarval verður á skránni, skrivar May-Britt Skoradal.
Diabetesfelagið takkar May-Britt fyri stóra íkastið, sum hon hevur givið til frama fyri fólk í Føroyum við diabetes, og vit ynskja henni alt tað besta við nýggju avbjóðingunum.
