Nýggja samstarvsavtalan við Novo Nordisk Grunnin, sum varð undirskrivað fyrrapartin, fer at verða føroyingum við diabetes til stórt gagn, heldur May-Britt Skoradal, forkvinna í Diabetesfelagnum

Fyrrapartin var hátíðarhald á Hotel Føroyum, tá stóra samstarvsavtalan við NOVO Nordisk Grunnin um eina føroyska Steno Miðstøð varð undirskrivað.

Við borðið sótu Martin Ridderstråle, varaforseti í Novo Nordisk Grunninum, Kaj Leo Holm Johannesen, landsstýrismaður í heilsumálum, og Turið Arge, aðalstjóri í Heilsumálaráðnum. Og á sjálvum borðinum lógu tvinnar avtalur, ein játtanaravtala og ein byggiavtala, og nú skuldu tær undirskrivast.

– Hvat betri mál kann ein seta sær, enn at bøta um lívsgóðskuna og livialdurin hjá borgarunum?, spurdi landsstýrismaðurin, sum ikki duldi fyri, at hann var sera glaður fyri alt fyrireikingararbeiðið, sum er gjørt, og tey úrslit, sum góður gróðrarbotnur nú er fyri at røkka.

Mangar røður vóru eisini hildnar á Hotel Føroyum í dag. Umframt Kaj Leo Holm Johannesen og Martin Ridderstråle, so røddu eisini Steinar Eirikstoft, stjóri í Sjúkrahúsverki Føroya, Rudi Kollslíð, leiðari á Medisinska deplinum, Egil á Bø, stjóri í Heilsutrygd og so May-Britt Skoradal, forkvinna í Diabetesfelagnum.

– Hetta er ein hátíðarløta í føroysku diabetessøguni, tí tað samstarvið, sum byrjar her, kann vera við til at tryggja bestu umstøður fyri fólk við diabetes og enntá at vera við til at minka um títtleikan av typu2-diabetes í framtíðini, segði hon og legði aftrat, at Steno Miðstøðin skal røkka longur út enn bara til eitt einstakt diabetesambulatorium.

– Munadygg viðgerðargóðska, sum er eins fyri øll, er eitt mál fyri okkum í Diabetesfelagnum. Og vit gleðast um málini fyri førleikamenning í øllum geirum, og um visjónina um sjúklingaútbúgving, tí vit vita, hvussu stóran týdning eginumsorgan hevur fyri fólk við diabetes.

– Føroyska Diabetesfelagið frøist eisini um ætlanirnar á granskingarøkinum, og tað arbeiðið, ið stendur fyri framman viðvíkjandi fólki, sum eru í vanda fyri at fáa diabetes. Ikki fyrr enn tá kunnu vit minka um tilburðirnar av typu2-diabetes, segði May-Britt Skoradal.

– At enda vil eg vegna Diabetesfelagið takka Heilsumálaráðnum fyri at hava tikið ímóti hesi innbjóðingini um samstarv, og til Novo Nordisk Grunnin vil eg siga: Takk fyri, at tit eisini vildu rætta hondina út til fólk við diabetes í Føroyum. Eg eri vís í, at August Krogh hevði verið bæði errin og glaður, um hann visti, hvat hendir her á Hotel Føroyum í dag, segði May-Britt Skoradal, forkvinna í røðu sínari.

Lesið virkisætlanina fyri Steno Miðstøðini her.

Lesið eisini um nøkur av átøkunum her.

Lesið somuleiðis tíðindaskrivið frá Heilsumálaráðnum í dag her.