Í samfull 29 ár stýrdi Bjørn Allgot norska diabetesfelagnum við sínum serstaka blandi av gaman og álvara. Nú hevur hann fingið heiðurstekin frá kongi fyri sítt stóra íkast

Í summar, tá Bjørn Allgot legði frá sær sum aðalskrivari, hevði norska diabetesfelagið stóra grein undir heitinum, “Mr. Diabetes takkar fyri seg”.

Fríggjadagin fekk hann viðurkenning frá kongi Noregs fyri sítt stóra arbeiði til frama fyri fólk, sum hava diabetes.

Bjørnar við heiðursbrævi og medalju frá kongi Noregs

Í sambandi við, at Bjørnar legði frá sær, streymaðu heilsanir úr eystri og vestri til hansara og norska felagið, og okkara forkvinna, May- Britt Skoradal, sendi eisini eina heilsan frá Diabetesfelagnum og limunum í Føroyum.

Undir yvirskriftini, “Ótroyttiliga og vinarliga virki Bjørnar Allgot”, skrivar hon m.a.:

– Bjørnar Allgot, aðalskrivari, hevur verið ímyndin av norska diabetesfelagnum í fleiri áratíggju. Tá føroyska diabetesfelagið varð stovnað fyri 33 árum síðani, fingu vit góða og dygga vegleiðing frá norska felagnum, og tað virðismettu vit høgt. Tá byrjaði eitt tætt og uppbyggjandi tilknýti millum feløgunum, sum hevur hildið øll árini. Og Bjørnar hevur við sínum stóra virkishugi og samstarvsídni verið ímyndin av tí góða samstarvsandanum, sum valdar millum Noreg og Føroyar.

– Bjørnar hevur á serstakan hátt stríðst fyri fólki við diabetes í Noregi, í norðurlondum og eisini í øllum heiminum. Altíð væl kunnaður um menningina á medisinska, tekniska og sosiala økinum hevur hann støðugt virkað fyri betri umstøðum fyri fólk við diabetes.

– Og so er Bjørnar einastandandi undirhaldandi! Hansara góðhýrur og káta lyndi fær fólk at koma nærri hvør øðrum, og hesar góðu eginleikarnar hava vit fingið ágóðan av í sambandi við sosial tiltøk í norðurlendskum høpi.

– Vit í Diabetesfelagnum í Føroyum eru Bjørnar inniliga takksom og ynskja honum eina ljósa, stuttliga og spennandi framtíð.

Og nú Bjørnar Allgot, norski Harra Diabetes, hevur fingið heiðursmedalju frá kongi Noregs, ynskja vit honum eisini hjartaliga til lukku!

Myndatekstur til høvuðsmyndina:

Láturkongurin. M.a. soleiðis stendur undir myndini av Bjørnar Allgot, sum Erik M. Sundt tók fyri norska diabetesfelagið, tá Bjørnar legði frá sær sum aðalskrivari í summar eftir ein mansaldur